Banhawism

صباح الفل,

قرار رقم 324 مكرر , مدونة بنهوز رجعت فى شكلها الجديييد و كان فى أسباب خلت الواحد يزهق من التدوين و سنينه , أولها ان الواحد كان فاهم التدوين غلط

مكانش عندى فكرة واضحة عن التدوين , كان الموضوع ملخبط بين انه “ممبر” و انه ” حركه جديدة” و انه ” صورة جديدة للتعبير الشعبى” , و الكلام ده ممكن يكون بيوصف التدوين من بره , يعنى كلام تقراه فى الجرايد و تشوفوا فى برامج التوك شو , بس ده ماينفعش يعبر عن أساس فكره التدوين , و أساس فكرة التدوين ان ملهاش أساس , يعنى من الآخر انت بتكتب الكلام ده لنفسك , عايز تخليه “ممبر” , عايز تبقى فى الموجة الجديدة , غايز نعمل نفسك فلوطة , عايز تكتب أى كلام انت حرررررررر

و الاختلاف لا يفسد للود قضية , يعنى ظاهرة التدوين بتكتسب سماتها من تجمع مختلف العوامل الفردية الحرة اللى بتدي التدوين بشكل جمعى مظهره العام , و المظهر العام ده بيختلف كل شوية , يعنى ساعات تلاقى الطابع السياسى هو الغالب على المدونات , و ساعات تلاقى الموضوع بقى فردى بحت , و ساعات تلاقى فى كذا نوع تدوين منتشر فى الساحة , يبقى نستنتج من كده ان الواحد لو ربط نفسه بالسوق و العرض و الطلب تدوينته مش حيبقى ليها لون , و حتفقد المعنى الأساسى للتدوين انه فردى فى البداية , علشان كده نصيحه لكل أخ مدون : فكك من الناس , اكتب اللى انت عايزة , ماتحاولش تنجر لشكل معين فى التدوين , خلى تدوينتك نعبر عنك , حتى لو كان النتيجة انك تختار ان المدونة ماتعبرش عنك , المهم انك تختار و فكك من الكلام بتاع “جماعة المدونين” , و “المدونين يطلقوا حملة مشعارف ايه” علشان مافيش جمعية اسمها حمعية المدونين المصريين , و ان كان حصل محاولات لتأسيس جمعيات شبيهة بس فكك , حيفقد معناه
و صباحك قشطة بالحليب